how to change :( :(
السلام عليكم ورحمة الله وبركاته
بكتب النهارده البوست ده لان فى واحده انا خلاص اتخنقت منها ومش عافه اعمل معاها ايه
قولت اجى اقولكوا المشكله ومتأكده 100 فى ال 100 ان انتوا هتلاقوللى حل وحل كويس اوى كمان
هى واحده قريبه منى اوى اوى مشكلتها هى قلة العزيمة والإرادة وتبقى ادق لو قلت انعدامها مش قلتها
بيبقى عندها طموح وحاجات كتير كويسه نفسها تحققها وبتحب دايما تكون متفوقه ومتميزة وبتحب تعمل حاجات كويسه كتير
بس كل ده بيدمر بسبب قلة العزيمة بيخليها مبتعملش حاجه من اللى نفسها تعلها دى
كسلانه اوى اوى
هى عاوزة على طول حد يزقها ويحمسها ويفكرها باللى وراها
وانا والله مش بسيبها كل يوم افضل اتكلم معاها واهزقها واقولها ان انتى مش بتعملى حاجه فى حياتمك
وانتى بت كسلانه وانتى وانتى وبفضل اتكلم معاها كتير
وفى اخر الحوار بتفضل تقولى ان هى خلاص مش هتبقى كسلانه تانى وهيبقى عندها عزيمة ولما تقول انا هعمل كذا يبقى لازم تعمله وتحقق احلامها الكتير اللى هى بتحلم بيها
واللى هى والله سهل تنفيذها اوى
لكن نعمل ايه بقى فى الكسل
ونقعد مع بعض ونحدد هى هتعمل ايه وخلاص بكره هعمل كذا وكذا
نيجي بكره خلاص وكان شيئا لم يكن ولا كانى فضلت ساعه اتكلم معاها امبارح وتنسى كل ده
وكل يوم بيتكرر نفس الحوار
خلاص زهقت ومش عارفه اعمل ايه
حد بقى يقولى على حل للبت دى عشان خلاص جبت اخري منها
للعلم بقى ولو عاوزين تعرفوا هى مين دى
اللى بتكلم عنها دى للاسف هى نفسي
امنية حياتى يبقى عندها ارادة قوية بجد
نفسي تحقق حاجه من اهدافها
نفسي تقول انا ادامى هدف معين لازم اوصله فى فتره معينه وبعد الفتره دى الاقيها وصلت فعلا
نفسي تقول حاجه وتعلمها
بتحلم كتير اوى وبتفضل تقولى ان هى هتعمل كذا ومن اول الترم الجاى بقى هبقى واحده تانيه وهزاكر من اول الترم وهعمل مش عارفه ايه
لكن مفيش حاجه من دول بتحصل
وكده بقى ف كل حاجه غير المزاكره يعنى بس انا حبيت اضرب مثال
لكن ده نفس نظامها فى كل امور حياتها
مستنية ردودكوا لانى محتاجاها اوى
تعالوا معايا عشان نساعد البت الغلبانه دى لان هى والله جواها حاجات حلوة كتير بس مش بتطلع
عشان خاطري ساعدونى انى انقذها من اللى هى فى ده قبل فوات الاوان
ربنا معاها والله بدعيلها من كل قلبى
كان الله فى عون العبد ما دام العبد فى عون اخيه
واانا اهو وفرتلكوا فرصه ان انتوا تكونوا فى عون عبد
متهيقلى بعد كمية الشحاته دى اكيد هستفاد من ردودكوا وبعدها هيبقى فى تغير جامد فى حياتى
سلام
هههههههه مش عارفة اقولك ايه ياهند الحقيقة …. لو قولتلك ان عمرك هو اصلا عبارة عن وقتك وبيتحسب عليكى وانك لازم تاخدى الموضوع بجدية شوية مش هايجيب نتيجة لانك اكيد قولتى كدة لنفسك ……. دى مشكلة عند المعظم ” ازاى تحفذى نفسك وتوصلى بيها للى انتى عاوزاه وتكونى راضية عن نفسك “دى بتكون حاجة صعبة والمعظم ماوصلش ليها لحل
بالنسبة لى فى حاجة ممكن تكون ماثرة معايا شوية …. مش هاقولك الاهل وتعبهم معانا لانها دى كمان مش بتجيب نتيجة اوى …. بس انا بحب ابص للى حوليا وخاصة اللى اعلى منى واللى وصلوله ومااقولكيش على كمية الاحباط لما عملت كدة فى الاول بالذات فى مجالنا ده بجد فى ناس عباقرة بالنسبة لى … ده فى الاول بس يعنى اللى يشوفها من نظرة تانية اقصد التعجيز مش هاقدر اوصل والنظام ده.. دى بتبقى مقدرة ليكى ربنا بيكون عاوزك تبداى فى وقت معين مش حكاية انك مش هاتقدرى توصلى للى انتى عاوزاه ….. مفيش حاجة اسمها كدة اصلا بدال عندك ارادة وعندك اهداف عاوزة توصليلها
بصى ليها من جهة انك تبقى زيهم ليه لا انتى موصلتيش لده لحد دلوقتى …. لانه مش نوع من الغباء موجود عند البعض والبعض لا
دى ساعات بتجيب نتيجة معايا الحقيقة وكل شخص وحسب طريقة تفكيره
سلام ياجميل ………..^_^
Comment by Mirage — July 5, 2008 @ 1:09 pm
مشكلة كبيرة وحلها صعب بس أنا من وجهة نظرى لو عندك وقت كافى أنك تبدأى معاها الحاجات اللى هى عايزة تعملها يعنى مش تقولها تعمل كذا وكذا لأ أبداي معاها وقوليها يللا نقوم نعمل كذا وكذا ومع الوقت هتبدأ تتحمس وتعمل هى الحاجة لوحدها عشان لازم هى كمان تساعد نفسها
هو ده رأيي
سلااااام
Comment by my fate — July 5, 2008 @ 1:29 pm
مش المشكلة في كتر الكلام ان انت تكلميها كل يوم لا الفكرة في ان هي فعلا تقتنع بالكلام
لان انت ؤلتي بكلمها كل يوم و تاني يوم تنسي اللي اتفقتو علية
لان الكلام نفسة اكيد اصبح مكرر ليها و سمعتة كتير ابل كدة فـ مفيش تاسير قوي للكلام المكرر لانة بيصبح روتين و هي بعد كدة او ممكن تكون وصلت لمرحلة انة دة اصبح العادي بتعها يعني لو ؤلتلها يا فشلة -مثلا- هيكون عادي و تكون وصلت لدرجة انها اقتنعت ب ان هي فشلة و مش بتعرف تعمل حاجة اذا الكلام دة مش مفيد هنا
في حاجة تنية ممكن تعملها تسمع مثلا محاضرات او ندوات في التنمية البشرية و البرمجة اللغوية العصبية NLP و في رواد كبار جد للمجال دة في العالم العربي و منهم د/ابراهيم افقي و في شرايط كست و حلقات علي الكمبيوتر و برامج تلفزيونية و كتب يعني اي وسيلة تحب تستعملها موجودة
و دة بيساعد كتير جدا علي تحديد الاهداف و القدرات و بيساعد علي تكوين الحافز المناسب
و ربنا يوفقني جميعا
Comment by Hunikal — July 5, 2008 @ 3:23 pm
والله يبنتى من اول متكلمتى عرفت انها انتى
بس وحياه جدو الباشا
لما تلاقى حل هاتيلى بربع مليم معاكى
Comment by la principessa — July 5, 2008 @ 4:39 pm
بصى يا هند بجد مش عارفه اقولك اييييه
تقريبا الطيور على اشكالها تقع يعنى ده نفس اللى بيحصلى
بس انا الحمد لله اليومين دول بقى عندى عزيمه شويه وبقيت فعلا مش اقول هعمل كده
لأ بقيت بقول انا هقوم اعمل كده واشد نفسى مش هيه ال تشدنى فى كل حاجه بقى مش فى المزاكره بس
حتى فى الطاعات كمان
صدقينى حاولى تعملى كده ممكن تنجح معاكى زى صاحبتك
سلام يا حبى ومتستسلميش لنفسك
Comment by katkat — July 5, 2008 @ 5:44 pm
عل فكره فيه ناس كتير من النوع ده
بتبقى محتاجه حد يوجهها ويزقها
المشكله مش فى قله العزيمه المشكله اللى بجد ايه الدافع فيه جمله كنت بقولها ادينى دافع وانا ارمى نفسى فى البحر اسالى نفسك انتى هدفك ايه طموحك ايه
بس الاول خدى كام يوم راحه وبصى عل اللى حويلكى وخصوصا اللى اعلى منك ساعات الحركه ديه بتفيد
وعشان تعمليها صح مش شرط انك تبقى لوحدك فى طموحك شوفى حد من اصحابك طموحكو مشترك وحطو خطوات تعملوها وان شا الله هتوصولو انتو الاتنين
Comment by dodo — July 6, 2008 @ 6:17 pm
ان الانسان يشارك حد دة شيئ كويس و بيساعد لاكن سعات كتير بيعطل لان مثلا الانسان اللي الي مشين معاه في نفس الهدف دة لو وقف او قرر انة يغير هدفة او حصل اي حاجى تمنعة عن الاستمرار دة غالبا بيكون لة تئثير سلبي علي الفرد و بيخلي الانسان انة يتوقف عن تحقيق حلمة او الاستمرار فية
لازم يكون الدافع لحاجة زي دي من داخل الانسان و وجود عامل مساعد خارجي هيساعد كتير لاكن لو مش موجود اذا برضة الانسان مستمر في تحقيق اهدافة
Comment by Hunikal — July 7, 2008 @ 1:50 pm
اولا انا شاكره جداااااا لكل اللى ردوا عليا
وربنا يعلم انا استفدت من كلمة كتبتوها
ربنا يكرمكوا يااااااارب
———-
Mirage:
يبقى اول حل انى ابص للاعلى منى وليه ماكونش انا زيهم واحاول اوصل لمستواهم
اوك
myfate:
يبقى لما اكون عاوزة اعمل حاجه ماقولش انا هعمل كده
لا اقوم اعمله على طول
اوك
Hunikal:
يعنى بجد كلامك صح اوى اوى
اكتر رد قرب من المشكله بصراحه
والله استفدت من ردك جامد اوى اوى
بس اكتشفت انى جاهله اوى اصلى بصراحه اول مرة اسمع عن ال NLP
بس دلوقتى عرفت عنها ومن المواضيع اللى اتحطت ع المنتدى اللى بجد فرحت بيها اوى واستفادت منها اوى
بجد حل واقعى اوى لان فعلا الكلام خلاص بقى معتاد يبقى الحل الاصح هو اللى انت قولت عليه
شكرا بجد كتير اوى اوى
la principessa:
عادى يعنى مهى باينه متفتكريش نفسك نبيهه ولا حاجه
حاضر يا حبى هبقى اجيبلك شوية بس تدفعى حقهم
بس قولى بقى لا اله الا الله
ومتقوليش وحياة جدو تانى
ماشى يا قمر
KatKat:
وانا هنسى فى الدراسه كل اما نتفق نزاكر حاجه
نيجي تانى يوم ولا انا زاكرت ولا انتى زاكرتى
ماشاء الله همم عاليه
يارب يا حبى تفضل همتك عاليه على طول زى اليومين دول
وزى ما قولتوا انتى وسارة فعلا حل كويس
والمفروض انى اعمل كده فى كل حاجه
dodo:
انا فعلا ببقى محتاجه اوى حد يزقنى على طول
والدافع برضه حاجه مهمه تحفز الواحد انه يعمل الحاجه دى
مشكلتى اصلا انى فعلا قعدت مع نفسى خلاص وحددت اهدافى وطموحى بس المشكله بقى انى مش بجري وراها
بس بصراحه حكاية انى ابدا مع حد مش هتنفع معايا
لان تقريبا اهتمامتنا مختلفه
كل واحد بادئ فى مجال غير التانى
ومرة تانيه بجد شكرا ليكوا كلكوا
مهما شكرت مش هطلع كل اللى جوايا والله
سلام
Comment by hend89 — July 8, 2008 @ 7:18 pm