ابدا ازاى ؟؟
السلام عليكم ورحمة الله وبركاته
بما اننا خلاص اخدنا الاجازة تقريبا يعنى
فقولت انى لازم اكتب الموضوع ده
اترددت اكتبه هنا ولا علامنتدى بس فى الاخر قولت اكتبه هنا احسن
بصوا بقى :
انا نفسي استغل الاجازه كويس بجد
نفسي اعمل حاجات كتير اوى
نفسي افهم اكتر فى مجال الكمبيوتر عموما
والبرمجه انا حاباها
بس مشكلتى انى مش عارفه ابدا بايه او ابدا ازاى
اكيد فى ناس ليها خبرات فى الموضوع ده سواء تجربه ليهم او تجربه شافوها قدامهم او كلام سمعوه من ناس اكبر سنا او اكبر خبرة
وانا مش عارفه اقرر او مش عارفه اعمل ايه
يعنى دلوقتى انا عاوزة اشتغل برمجه
يعنى نفسي اكون مبرمجه ناجحه وشاطره بجد
فدلوقتى فى ناس قالوا الجافا احسن من السي شارب وانا نفسي اتعلمها وخصوصا عشان هى اوبن سورس
لكن انا بقول ان انا بدات فى السى شارب وعرفت اساسيتها وكمان لو استخدمنا برمجه فى الكلية السنتين الجايين هتكون غالبا سي شارب يبقى اكمل فيها صح ولا ايه ؟؟
يعنى اكمل سي شارب ولا ابدا جافا ؟؟
وكمان سواء بدات ده او ده
ازاى اتعلم البرمجه واوصل للى انا عاوزاه فيها
يعنى اتعلم منيييييين عشان اتعلم صح
كورسات ولا دورات ودروس ع النت ولا كتب
ولو كورسات يبقى فين ولو دروس ع النت يبقى مواقع ايه ولو كتب يبقى كتب ايه
الناس هتقول مثلا اننا مش عاوزة اتعب وادور وكده بس لا والله انا اكيد هدور واكيد دورت بس انا عاوزة اعرف راي الناس بجد كلها فى الموضوع ده
يعنى نفسي الناس كلها ترد عليا ويقولولى كل الى يعرفوه
معلومه صغيره او كبيرة رفيعه او تخينه
اعتبرونى واحده جاهله او واحده لسه على اول سلمة ونفسها توصل للسطح
بس مش عاوزة اركب اسانسير انا عاوزة اطلع سلمه سلمه
بس انا لسه مش بعرف امشى فعاوزة حد بقى يعلمنى المشي وطلوع السلم ازاى
بجد عاوزاكوا تقولولى كل اللى تعرفوه وكل اللى فى نفسه حاجه يقولها لان كل كلمة هستفيد منها ومحدش يخاف ليكون رده طويل او كده ده لو حد عبرنى ورد يعنى
انا عندى استعداد كل واحد يكتب رد صفحه مالكوش دعوه انا هقرا بس انتوا اكتبوا
ومستنية ارائكوا الكتييييييييره وياريت متحرجونيش
يللا سلام
بصى يا هند ..انتى عارفه ان انا اخذت قبل كدا دوره فى البى اتش بى ..بس والله حسيت انها مش ليها اى لازمه يعنى اللى اخذته فى الكليه كان احسن من الدوره هو المهم ان انتى تعملى مشاريع صغيره فى السى شارب وبعدين تكبريها بقى يعنى تبدئى تعملى لعبه مثلا صغيره كدا على قدك وبعدين تكبرى شويه شويه لغايه ما تعملى مشروع كبيير قدك برده
وبعدين يا ستى تقراى بقى كتاب عن الداتا بيس للسى شارب ومن على النت وكدا يعنى
انا عن نفسى هاعمل كدا ان شاء الله
ولو اخذت كرسات هاخذ فى الحاجات اللى مش اعرف عنها حاجه وصعب اتعلمها لوحدى مثلا soft skill
بفكر اخذ فيها قوى والحاجات اللى صعب تتعلميها لوحدك وصيانه كدا يعنى
انما طالما انتى عارفه مبادئ السى شارب صدقينى احسنلك تقراى كتب وتقضيها نت وخلاص والمعيدين موجودين لو احتاجتى مساعده والمنتدى موجود
لكن الدورات ديه تاخديها لو انتى مش عارفه حاجه عن الكرس ده
ولو جيه على بالى حاجه تانيه هابقى اقولهالك
علشان كفايه كدا علشان لسه مش ذاكرت حاجه فى الكريمه
سلاااااام
Comment by Dina — June 3, 2008 @ 4:26 pm
موضوع ممتاز يانودى والله … وبجد .. بجد .. انا كنت مستنية الاجازة الفعلية تيجى … عشان اتكلم فى الموضوع دا …بس انا برضه زيك كدا … كنت هسأل بس.. وتقريبا نفس اللى انتى قلتيه … كان اتقال لنا ان الجافا احسن واوبن سورس وكدا .. وقلنا خلاص .. هناخدها .. فى الاجازة دى .. وكنا قلنا.. لناس عشان يشوفوا لنا .. حد يدى جافا .. بعيد عن الشركات والخنقة (دا على حد قولهم) بس محصلش نصيب .. وفى النهاية .. اللى رسيوا عليه ان الجافا .. مجالها التدريسى اقل ..واللى هتلاقيه يدرسلك فيها .. مش هيفيدك أوى .. والسى شارب .. هو اللى تلاقيه .. وتلاقى اللى يفيدك بجد فيه …
واحنا برضه مش عارفين …
بعد ما قالولنا كدا … قلنا خلاص تمام .. ممكن سى شارب على اساس اننا واخدين مبادئها على الاقل ..أو قالوا انها اسهل من الجافا وكدا …
بس احنا لسة مش عارفين … وربنا يستر …
سورى إنى مش أفدتك … لكن انا بجد .. مستنية معاكى …. ردود وأراء الناس اللى ممكن يفيدونا انا وانتى …. وربنا يستر والاجازة دى كمان مش تضيع …
سلاااااامز
Comment by MeMe — June 3, 2008 @ 4:31 pm
في البداية انت تاريبا اخدتي اول خطو ان انت تسئلي و تدوري
المهم بقي بعد كدة
نيجي مثلا لموضوع سي شارب ولا جافا :
اة احنا اتعلمنا شوية سي شارب في الكلية لكن عموما في البرمجة اعتقد ان الاساسيات اللي اتعلمناها في اي لغة بتفيد في اللغات التانية و بتساعد فـ اكيد لو هتبدائي مثلا جافا فـ السي شاري مكنش تضيع وقت وخلاص لا هتلاقي ان معاكي اساسيات و فهمة الموضوع ماشي ازاي
نقطة تتانية هي هلي البداية كورسات و لا معنفسك و مواقع و نت و كتب و كدة :
هي الميزة في الكورسات ان هي بتنجز و طبعا اللي بياخد كورس مش بيوقف عند كدة لا لازم يكمل و يقرا كتب و يشتغل في مشارع بنفسة ,
انما لو كان الاسلوب هيكون من غير كورسات فـ ممكن الموضوع ياخد وقت اطول شوية لان انتي اللي هتكوني بتدوري علي المعلومة مش هي اللي بتجيلك و هيحتاج مجهود اكبر شوية
وهنا القرار يرجع ليكي يعني مثلا لو ؤلتي هتتعلمي مع نفسك اوك كويس جدا بس تكوني عارفة انك محتاجة تكملي بـ نفس الحماسة اللي بدائتي بيها دي
يعني انا مثلا بقراء في الـ PHP لوحدي و بحاول اتعلمة وكدة و الموضوع واخد وقت معايا و سعات ممكن الواحد يريح شوية و ميقرائش لاكن الحمد لله بحاول ارجع و الكمل و اطعت فية شوط كويس
لكن ارجع تاني لنقطة مهمة ان الاستمرار هو الشيء المهم و حتي لو كان تعليم زاتي او كورس المهم بعد كدة اية يعني مش هقراء مثلا في الي حاجة و بعدين خلاص لا لازم اكمل و اعمل مشاريع و اتعلم زيادة
و في النهاية اتمنالك التوفيق و ان انت توصلي لقرار بسرعة برضة ابل ما جزء كبير يضيع من الوقت
ويارب يوفقنا جميعا
Comment by eslam.mahmoud Hunikal — June 3, 2008 @ 4:53 pm
Dina:
شكرا ليكي يا دندن ع الرد
يعنى انتى رايك ان الدورات مالهاش لازمه طالما انا عندى اساسيات يبقى اكمل انا وابدا بمشاريع صغيره واكمل كتب ونت واسئلة
مماشي كلام جميل
MeMe
مش معقول ميمي فى بلوجي
لا انا بحلم اخيرا يا بنتى عرفتى تردي
ولا يهمك كلنا واحد المهم نعرف الاجابه مش مهم مين اللى يسال
وابقى تابعى بقى وان شاء الله نوصل لحل ونحقق اللى احنا عاوزينه ونستغل الاجازه صح
eslam.mahmoud Hunikal
طب كويس والله انى كده اخدت اول خطوة ويارب استمر
بحب انا الامل ده والله
ماشى بالنسبة لموضوع جافا او سي شارب
ماشى معاك ان اساسيات الجافا هتفيدنى فى اى لغة برمجه لكن انا بقول اكمل سي شارب عشان تفيدينى فى الكلية
صح ولا جافا احسن من سي شارب ؟؟
ماشى يعنى الخلاصه الاستمرار
ان شاء الله هيكون فى استمرار
والله بدعى دايما انى اكمل فعلا بنفس الحماسو انى يبقى عندى عزيمة ان شاء الله لانا فعل اهم حاجه
وبجد بشكرك جدا جدا والله ع الرد واكيد افادنى كتير جدا
سلامو عليكو
Comment by hend89 — June 3, 2008 @ 5:05 pm
السلام عليكم ورحمة الله وبركاته
كويس ان حضرتك فعلا عاوزه تستفيدي من الأجازة وكويس ان حضرتك عاوزه تبدأي من أول الأجازة
————————————-
وأنا هقول لحضرتك علي وجهة نظري ورأيي في الموال دا كله :: أولا تبدأي بايه .. بما ان حضرتك عارفه سي شارب فأنصح حضرتك تكملي سي شارب دا لو حضرتك عاوزه تطلعي بأكبر قدر من الاستفادة .. يعني بدل ما حضرتك تضيعي شهر في الاساسيات بتاعة اللغة الجديدة .. تكملي علي اللغة اللي حضرتك عارفاها .. بس تكملي جامد ومن غير كسل .. والموضوع لذيذ والله
وبعدين لما حضرتك تتقني لغة كويس .. لما تبدأي في لغة تانية بجانب اللغة القديمة هتبقي أجمل وأحسن
أما عن الأوبن سورس وكدا … عادي جدا .. بما ان حضرتك مش هتستغني اصلا عن الويندوز في الفترة الحالية .. يبقي زي ما قولت لحضرتك … وعلي ما حضرتك تبقي متمكنة من اللينوكس .. هتكوني بدأتي في اللغة التانية فتبقي أجمل وأجمل
#####################
إزاي البداية :: هنا بقي عاوز اقول لحضرتك … حاولي الشهر دهو مع نفسك كدا .. حاولي تنزلي كتب كويسة في السي شارب مثلا .. زي
Oreilly
Apress
ولو حضرتك دورتي كويس علي كتب هتلاقي ناس كتير في مواقع ومنتديات بيفضلوا كت كويسة جدا بسابق خبرتهم او دراستهم في الكتب دي
بس المهم حضرتك تبدأي بجد .. وتبدأي بنظام مكثف
ولو حسيتي ان الشهر دا جه بفايدة .. أنصح حضرتك تكملي مع نفسك .. لأسباب بسيطة جدا .. ان حضرتك هتكوني درستي كل اللي بيتدرس في الكورسات بل بالعكس بزيادة
لان حضرتك اللي قراتي واكتشفتي الحاجات في البرنامج وكدا …
هيبقي باقي لحضرتك شهرين .. حضرتك تبدأي تكثفي الموضوع اكتر وتبداي مشاريع وتعملي برامج وكدا .. وهتلاقي مواقع كتيرة هتساعدك واي حاجة بتقف علي حضرتك بتسألي وهتلاقي ناس كتير جدا هتساعدك
للعلم لغة سي شارب مش قليلة .. بالعكس لغة جميلة والله .. وبقت منتشرة بشكل رهيب وعلي فكرة بيتعل بيها دلوقتى أوبريتنج سيستم
Singularity Project
وربنا يوفقك للي فيه الخير … تقبلي مروري
Comment by Falcon — June 3, 2008 @ 5:48 pm
والله هو فعلا مدام بداتى تسالى وكده ديه لوحدها تعتبر اول الطريق
انا بالنسبه لى بصرااحه فى حكاية البرمجه ديه مش عاارف فى ناس قالولى اخد جافا
بس انا كويس فى السى شاارب
فاا ممكن عشاان اتقنها مثلا او كده اخد فيها قورص لان فعلا القورص بينجز
انا طبعا عمرى ما هاخد قورص فى السى شاارب
انا بكلم على سبيل المثاال
حضرتك مثلاا لو عايزه فعلاا تدوسى فى البرمجه فى الاجازة
شوفى حضرتك هتفضلى تشتعلى بايه
الاساسياات فى اى لغة برمجه ثابته فا ممكن تاخدى قورص كويس فى الجافا
وبعديه تحاولى بقه تقراى مع نفسك وتدخلى فى مشاريع وكده
وان شااء الله ربنا يوفقك وتوصلى للمستوى الى انتى عايزاه
سلام عليكم
Comment by ABDELHAMID IBRAHIM — June 4, 2008 @ 2:04 am
السلام عليكم
طبعا انا مقرأتش الردود اللي قبلي كلها عشان مش قادر أقرأ حاجة دلوقتي
بس هقوللك وجهة نظري
انا عن نفسي عامل زيك كده في حكاية البرمجة
انا كنت شغال سي شارب و عايز اسيبها و ابدأ جافا … بس عايز أبدأها مع نفسي “سيلف ليرننج” عشان مش عايز حمل اهلي مصاريف اكتر من كده و كمان معايا صحابي ناويين فان شاء الله ممكن نتعلم من بعض و نشوف ايه اللي ناقصنا و كده
ليه بقى ناوي اسيب السي شارب و اشتغل جافا
ده عشان كذا سبب … و انا هقول اهم سبب فيهم و اللي بجد يهمني اوي وهو الشهادة المعتمدة اللي باخدها بعد ما امتحن الجافا
“Sun Java Certified Programmer”
أعتقد اسمها الصح كده
المهم يعني ان الشهادات المعتمدة دي بتبقى مفيدة جدا جدا للشغل بعد كده و هي دي فعلا اللي تستحق انك تقولي عليها شهادة بجد
اه نصيحة برضه
لو ناوية فعلا تدوسي في البرمجة … خدي حاجة تانية خفيفة معاها عشان ماتزهقيش من البرمجة بسرعة
سلام
Comment by BooDy — June 5, 2008 @ 12:33 am
شكرا بجد جدا جدا جدا جدا ( من هنا لبكرة )ليكو كلوا ع النصايح الغاليه دى
لان بجد الكلام ده كله هيفدنى اوى
بس انا برضه لسه محتارة اوى
ان شاء الله هفكر مع نفسي كده شوية وافكر فى ارائكوا واشوف انا هبدأ ايه
ادعولى بقى
وبجد شكرااااا اوى اوى
سلام
Comment by hend89 — June 5, 2008 @ 1:10 pm
طب يا جماعه تقريبا كده يعنى انا استقريت على سي شارب خلاص
هو انا لسه مش مستقره اوى بس بنسبة اكبر من الجافا
دلوقتى بقى عاوزة الناس اللى ماشة فيها يعنى كويس يقولولى هما ازاى وصلوا للمستوى ده
يعنى البداية كانت ازاى لحد اما وصلوا لدلوقتى
وشكرا ليكوا
سلام
Comment by hend89 — June 5, 2008 @ 8:32 pm
بما ان حضرتك استقريتى على السى شارب
انا هاقول لحضرتك الطريقه اللى كنت ماشى بيها
كنت جبت تقسيمه كده .
-introduction to the C#.NET
-Introduction to the .NET Framework & C#
-C# Language Fundamentals
-Classes & Objects
-Inheritance & Polymorphism in C#
-Structures, Enumeration, Garbage -Collection & Nested Classes
-Abstract Classes & Interfaces
-Arrays, Collections & String Manipulation
-Exception Handling in C#
-Delegates & Events
-WinForms & Windows Applications
-More Windows Controls and Standard Dialog Boxes
-Data Access in .Net using ADO.Net
-Multithreading in C#
-File System & Streams
المواضيع دى ممكن تلاقيها فى كتب كتير جدا , لكن اهم حاجه يكون كتاب شارح على ويندوز أبليكيشن
وكمان جمب الكتاب كان فى فيديوهات شارحه المواضيع دى كلها بالترتيب برده.
ان شاء الله انا برفعهم الوقتى واول لما يخلصوا هاحطهم على منتدى نور الهدى بس قدامهم يومين ولا حاجه عشان هما 400 ميجا
وربنا يوفقك وتعملى كل اللى انتى عاوزاه الاجازه دى ان شاء الله
Comment by soul_of_darkness — June 6, 2008 @ 7:46 am
مش عارفه اقولك ايه والله يا بشمهندس عمرو
عشان كده مش هقول حاجه غير شكرا بس
:D
Comment by hend89 — June 6, 2008 @ 8:09 pm