hend

السلام عليكم ورحمة الله وبركاته

عاوزة اتكلم عن موضوع تربية الاطفال

الواحد بيشوف اطفال عندها اخلاق عاليه اوى ومحترمين اوى وبيعملوا اللى وارهم على اكمل وجه

وبيشوف اطفال تانيه مش محترمين خالص وعندهم لا مبالاه مش بيزاكروا ولا بيعملوا حاجه

المشكله انى هتجنن واعرف هل ده نتاج تربية الاهل ؟؟

هو ده المفروض ان تربية الاهل بتنعكس على الطفل

لكن نيجي نقول كده للاهل يقولوا ان هما عملوا اللى عليهم وان بوظان عيالهم من مؤثرات تانيه

زى مثلا التليفزيون او النت او الشارع او المدرسه والاصدقاء

اكيد كل دول ليهم عوامل بس المفروض يكون العامل الرئيسي واللى بيتحكم فى كل ده التربيه

صح ولا ايه

انا عندى كلام كتير اوى فى الموضوع ده ونماذج قدامى وقريبه من اوى هما اللى حيرونى فى الموضوع ده

عشان كده عاوزة اعرف أرائكوا فيه

لانى خلاص اتعقدت بجد اوى اوى

عاوزة اعرف هل فى امل ان الواحد يطلع اطفال متربيين ولا خلاص دى حاجه مش فى ايدي

يعنى قولوى الغلط فين ؟؟

سلام

السلام عليكم ورحمة الله وبركاته

هتكلم فى موضوع بفكر فيه كتير وليا رأى فيه وعاوزة اعرف ده رأيي انا لوحدي ولالا ؟؟

الموضوع ببساطة زى العنوان هل الولاد اذكى من البنات ؟؟

رايي بقى فى الموضوع

ان الولاد اذكى من البنات 

او هقول بمعنى تانى ان البنات بيحفظوا اكتر ما بيفهموا لكن الولاد بيفهموا اكتر ما بيحفظوا

ده غالبا يعنى

لاحظت الحكاية دى اوى

وخصوصا لما كنا فى رياضه2 كانت نسبة الولاد اكتر من البنات بكتير

معظم البنات بيدخلوا احياء عشان مادة حفظ اوى

ومن خلال ملاحظتى بقى فى المدرسه والدروس مثلا وكده لاحظت الفرق ده اوى

بعدها فكرت فى حاجه كمان 

لما تيجي تسأل الاطفال هما نفسهم يطلعوا ايه

معظم البنات بيقولوا دكتورة ومعظم الولاد مهندس 

صح ؟؟؟

نيجي بقى فى الكلية معظم اللى بيدحوا ويحفظوا ويصموا ويطلعوا الاوائل بنات

معظم اللى بيشتغلوا فى المشاريع وناجحين فى الشغل هما الولاد

يعنى مثلا ع المنتدى لما حد يسال سؤال فى الكمبيوتر مفيش بنات بترد الولاد هما اللى بيردوا

لما حد يجي يشرح حاجه الولاد هما اللى بيشرحوا مش البنات

انا والله مش متدايقه من الموضوع ولا حاجه يعنى

بس انا بس مستغربه

وعاوزة اعرف رأيي ده انا لوحدى ولا انتوا ايه وجهة نظركوا ؟؟

وهى والله مش عقدة ولا حاجه

الموضوع عادى يعنى جدا

امبارح قبل اما انام فكرت فيه فقولت اكتبه النهارده واشوف رأيكوا

يعنى كلامى صح ولا غلط ولو صح فهو ليه كده مينفعش ده يتغير ؟

وطبعا انا متكلمتش عن الكل انا بقول المعظم

يعنى طبعا لكل قاعده شواااااااااااااااااااااذ

لكن الاغلبيه كده

بس كفايه كده

سلام

السلام عليكم ورحمة الله وبركاته

 اولا : الموضوع بينقسم إلى شقين

شق سعادة وشق حزن

نتكلم عن شق السعادة الاول

النهارده كان آخر يوم فى الامتحانات خلاص الامتحانات خلصت

بجد مش مصدقه حاسه انى بقالى قرن بمتحن مش عارفه فى ايه

من اول ما بدأنا اول امتحان ميد تيرم من يومها واحنا فى دوامة الامتحانات

النهارده بقى خلصلنااااااااااااااااااااااااا

كان ختامه مسك

الجرييييييمه

الامتحان كان رائع وكان جاى من الاسئلة اللى الدكتور ادهالنا

حليت اول سؤالين بس مش حل كامل طبعا لانى ماليش فى الدش والكتابة الكتير

السؤال التالت مجبتش سيرته فى الورقه خالص

الرابع والخامس ألفتهم

خلصت الساعه 2 ونص

عظمه على عظمه ياست

بس النهارده مكنتش شاذه فى خروجى بدري

الدفعه كلها اكنت برا ع الساعه 3

وفضلنا قاعدين بقى مع اصحابنا 

الناس كلها كانت قاعده ومكانوش عاوزين يروحوا

وبعد كده اسماء اخت اسلام جتلنا الجامعه

البنات كلهم بتوع المنتدى رحبوا بيها اوى اوى

لانها بصراحه زى العسل وانا بجد بحبها اوى

وهى كان نفسها تتعرف على كل الناس اللى ع المنتدى

المهم سلمنا ع العيال كلهم وكده وبعدين خرجنا انا واصحابى روحنا اتغدينا 

وبعد كده ودعنا بعض وبعدين خلاص روحت وقاعده ع البلوج دلوقتى

اول مرة اقعد عليه فى الاجازة احساس مختلف برضه

نيجي بقى للشق الحزين فى الموضوع

بجد كنت زعلانه جدا جدا ومش مصدقه انى مش هنزل الكلية ومش هشوف اصحابى تانى

كنت بسلم عليهم وانا زعلانه مووووووووت والله

بجد انا بحب الكلية وكل اصحابى اللى فيها اوى اوى اوى اوى

انا مش قادره اتخيل انى مش هنزل الكلية تانى كل يوم لمدة 3 شهور

ياااااااه كتير اوييييييييييي

خلاص يعنى كنت ماسكة دمعتى بالعافيه والله

رغم انها نزلت يعنى بس مش اوى

قدرت امسك نفسي

بجد بقول لاصحابى كلهم انهم هيوحشونى اوى اوى اوى

ويارب اشوفهم السنة الجابة على خير ونكون كلنا حققنا اللى نفسنا نحققه فى الاجازة

بتمنى لكل الناس اجازه سعيده بجد

ويارب اعمل كل اللى نفسه اعمله فى الاجازة دى قبل اما السنة الجابه تبدا

ويارب كل واحد يدخل القسم اللى هيكون موفق فيه ان شاء الله

سلام

السلام عليكم ورحمة الله وبركاته

بما اننا خلاص اخدنا الاجازة تقريبا يعنى

فقولت انى لازم اكتب الموضوع ده

اترددت اكتبه هنا ولا علامنتدى بس فى الاخر قولت اكتبه هنا احسن 

بصوا بقى : 

انا نفسي استغل الاجازه كويس بجد

نفسي اعمل حاجات كتير اوى

نفسي افهم اكتر فى مجال الكمبيوتر عموما

والبرمجه انا حاباها

بس مشكلتى انى مش عارفه ابدا بايه او ابدا ازاى

اكيد فى ناس ليها خبرات فى الموضوع ده سواء تجربه ليهم او تجربه شافوها قدامهم او كلام سمعوه من ناس اكبر سنا او اكبر خبرة

وانا مش عارفه اقرر او مش عارفه اعمل ايه

يعنى دلوقتى انا عاوزة اشتغل برمجه

يعنى نفسي اكون مبرمجه ناجحه وشاطره بجد

فدلوقتى فى ناس قالوا الجافا احسن من السي شارب وانا نفسي اتعلمها وخصوصا عشان هى اوبن سورس

لكن انا بقول ان انا بدات فى السى شارب وعرفت اساسيتها وكمان لو استخدمنا برمجه فى الكلية السنتين الجايين هتكون غالبا سي شارب يبقى اكمل فيها صح ولا ايه ؟؟

يعنى اكمل سي شارب ولا ابدا جافا ؟؟

وكمان سواء بدات ده او ده

ازاى اتعلم البرمجه واوصل للى انا عاوزاه فيها

يعنى اتعلم منيييييين عشان اتعلم صح

كورسات ولا دورات ودروس ع النت ولا كتب

ولو كورسات يبقى فين ولو دروس ع النت يبقى مواقع ايه ولو كتب يبقى كتب ايه

الناس هتقول مثلا اننا مش عاوزة اتعب وادور وكده بس لا والله انا اكيد هدور واكيد دورت بس انا عاوزة اعرف راي الناس بجد كلها فى الموضوع ده

يعنى نفسي الناس كلها ترد عليا ويقولولى كل الى يعرفوه

معلومه صغيره او كبيرة رفيعه او تخينه

اعتبرونى واحده جاهله او واحده لسه على اول سلمة ونفسها توصل للسطح

بس مش عاوزة اركب اسانسير انا عاوزة اطلع سلمه سلمه

بس انا لسه مش بعرف امشى فعاوزة حد بقى يعلمنى المشي وطلوع السلم ازاى

بجد عاوزاكوا تقولولى كل اللى تعرفوه وكل اللى فى نفسه حاجه يقولها لان كل كلمة هستفيد منها ومحدش يخاف ليكون رده طويل او كده ده لو حد عبرنى ورد يعنى

انا عندى استعداد كل واحد يكتب رد صفحه مالكوش دعوه انا هقرا بس انتوا اكتبوا

ومستنية ارائكوا الكتييييييييره وياريت متحرجونيش

يللا سلام 

السلام عليكم ورحمة الله وبركاته

يارب الدفعه كلها تكون مبسوطه من الامتحان وتكونوا كلكوا حليتوا كويس ياااااااارب

مش عارفه بصراحه انا ايه اللى حصلى النهارده

بس انا دلوقتى مخنوقه اوى ومتضايقه جدا جدا

من اول الترم اول مرة اخرج من امتحان زعلانه كده حتى الجرافيك كنت متضايقه بس مش اوى زى النهارده

اول ما اخدنا ورقة الامتحان افتكرت الامتحان صفحتين بس اللى هى الصفحة الاولى والاخيره مشوفتش اللى فى ضهر الاولى

ففرحت وقولت كويس هلحق اخلص واحل براحتى

وبعدين اتصدمت لما قلبت الورقه

عدت الصدمه

بدات احل فى السؤال الاول بعد اما بدات فيه وفضلت افكر جم قالوا انه ملغي

مش عارفه احنا فى محاضرة ولا امتحان الصراحه

المهم بعد كده قالوا ان التوتال فلوت ملغى والكوست معانا

ده ايه الهم ده ياربى

واتخنقت زياده

جت الصدمة الاكبر ان الامتحان ساعتين

زعلت اوى

بدات احل فى السؤال التانى

ولانى كنت حاسه انى مش هلحق اخلص فكنت بحل بسرعه وطبعا بدون تركيز

وقلت المهم اخلص وبعد كده فى الاخر ابقى اراجع

للاسف وصلت لاخر مساله وكان لسه خمس دقايق بس

سلمت الورقه وخرجت وانا زعلانه جدااااا

اول ما خرجت شوفت البت دينا والبت اسلام لقيتهم مبسوطين واستغربوا اوى انى زعلانه

ولقيتهم بيقولوا ان الامتحان والوقت كويسين

بداو يضحكونى وانا ولا انا هنا 

اسلام راجعت معايا طلعنا حالين زى بعض

والنواتج صح وكل حاجه

بس انا حليت النقطه التانيه فى الخامس وهى حلت الاولى

رغم انى حاله كويس بس مكنتش مبسوطه

يمكن لانى كنت حاطه امل اكبر من كده ع الماده

كان نفسي اخلص براحتى واراجع واظبط الورق على مزاجى

يمكن لانى تعبت اوى فى الماده وكنت فاهماها كويس اوى

فكان نفسي اعمل فيها احسن من كده 

يمكن زى ما واحده صاحبتى وحبيبتى قالتلى حسد

وقالتلى نصيحه : ان لما اكون وائقة من ماده كويس وشاطره فيها ماسيحش لنفسى

ما علينا

بس طبعا اول حاجه قلت الحمد لله على كل حال

وربنا يسهل

كان نفسي اوى يكون البوست احلى من كده

بس كان لازم اقول اللى جوايا

يللا حصل خير

ويارب اكون انا بس اللى حالتى كده

يارب يكون الناس كلها مبسوطين

سلام